Badakalar Kudin Makamai: Mun kashewa Malamai N2.2bn wajen addu’o’i a yakin da mukai da Boko Haram, daga Najeriya zuwa Saudiyya, in ji wadanda ake tuhuma.

Wani jami’in EFCC mai bincike, Mr Adariko Michael,
a ranar Talata ya yi zargin cewa an kashe N2.2 biliyan wajen yin addu’o’i a Najeriya da Saudi Arabiya don cin nasarar yaki da masu tayar da kayar baya a kasar.

Michael yana bayar da shaida ne a matsayin mai gabatar da kara na farko (PW1) a shari’ar da aka yi wa Kanal Sambo Dasuki mai ritaya, tsohon mai ba Shugaban Kasa shawara kan harkokin tsaro (ONSA) kan badakalar cinikin makamai dala biliyan biyu.

Sauran wadanda aka gurfanar da Dasuki sun hada da tsohon Janar Manaja na Kamfanin Mai na Kasa (NNPC), Aminu Baba-kusa, Acacia Holdings Limited da Reliance Referral Hospital Limited.

Hukumar

ta EFCC ta tuhume su ne da aikata laifuka 32 da suka hada da karkatar da kudade, cin amana ta hanyar aikata laifi, sakin gaskiya da karbar makudan kudade a gaban mai shari’a Husseini Baba-Yusuf.

Lauyan EFCC, Rotimi Jacobs SAN, ne ya bayar da shaida a gaban sa, Micheal ya ce ana zargin an tura N750million daga asusun musamman na ONSA zuwa asusun Reliance Referral Hospital Limited tare da First Bank.

Ya kara da cewa an kuma tura N650million zuwa asusun Acacia Holding Limited tare da EcoBank, yayin da aka tura wani N600million da N200million zuwa asusun kamfanin tare da UBA.

“Tsakanin 27 ga Satumba, 2013 da 16 ga Afrilu, 2015, an sanya Naira miliyan 50 a asusun Asibitin Reliance Referral Hospital.

“Dangane da martani daga bankunan da abin ya shafa, a matsayina na jami’in bincike, mun gano cewa an tura kudi ga mutane da kamfanoni da dama.

“Lokacin da muka shiga bayanin asusun, mun tambayi wanda ake kara na biyu (Aminu Babakusa) dalilin haka.

“Ya sanar da mu cewa anyi amfani da kudin ne wajen daukar Malamai domin yi wa kasa addu’a dangane da rikicin Boko Haram.

“Lokacin da muka nemi ya ba da sunaye, lambobin sadarwa da lambobin waya na malaman da ya dauka aiki don yi wa kasa addu’a, sai ya ambaci guda biyu kawai,” in ji shi.

Bayan sauraron shaidar,
Mai shari’a Baba-Yusuf, ya dage sauraron karar har zuwa ranar 11 ga Nuwamba don ci gaba da sauraren karar. (NAN)

Leave a Reply

Your email address will not be published. Required fields are marked *